Dös neua Jahr hot erscht bägunna,
drum sen mä heit beim Merz s'zam kumma.

So wünsch mä uns halt ölla zamm.
a gutes Holz,an guten Stamm.

Denn jedä da fest rennt un schaft,
da is a bei dä Körperschaft.

a kle's Fest wölln ma heit bägahn,
ihr werd dös ja gleich hörn un sahn.

Dös is für eura gruaßen Plog,
fest säg un hack un Stämm naus trog.

Un wenn mä a mol nümä ka,
do schreit en a da Bert gleich a.

Jedoch ihr Leut dös is sei Pflicht,
dös wennigsten's enä noch dann Racht'n sicht.

doch gut is wenn mä hot zwe Uhrn,
no denkt mä sich du bleibst mä g'schurn

un wenn a hot net immä Recht,
so gäbs na halt ,süst geht däs schlacht.

doch all für seina Muh un Plog,
wölIn mä na haltä Dankschö sog.

Doch unnä Fürstand is a Ma,
dann mä doch bluas nä Loben ka.

Wenn da durt seina Bäm taxiert,
do is a meistens ganz väwirrt.

denn ölla sen sa figgelgrumm,
ihr Leut wu sölln mä do hie kumm.

Da Schurns Hans is a Holzfachmann,
da a die grumma bärach'n kann.

Un unä Vürstand a ganzä Weiser
da schreibt gleich immä an dann Kaiser.

dä List'n noch,a prima Gschäft,
drüm hot a sä gleich Ölla käft.

Da Vürstand hot vä Fred gälacht,
un mir ham a gut's G'schäft gämacht.

däzu gibts a nuch Wurscht un Bier,
un deshalb sen mä heit a hier.

drüm wölln mä sei heit ohna Surgen,
denn kennä braucht heit wos zä burgen.

Drum wölln ma bluas nuch e wos sog,
es lebe una Vürstand hoch.

Jedoch bei uns is ja so üblich,
weil mä heit sen emol gämüdlich,

so kümmt a unnä Wirt nuch dra,
denn da hot ja dann Nutz'n a.

An seina Wörscht un an sein Bier,
drum liebä Merz jetzt sog ich dir,

gäb doch emol dein Herz an Stoß,
un stell auf jeden Tisch a Moss,

denn du bist doch a gutä Ma,
dös sieht mä doch dein Lach'n a.

Un wenns van mir war bluas a Schwank,
so sog ich dä vuraus schön Dank.

Dann Otto felts jedoch net leicht,
a muß erscht seina Weibä beicht.

noch langä Zeit, küimnt ä gärennt,
un hot an Moßkrug in dä Hend.

Die Weibä ham dan Rest gäbracht,
un ham däbei hemlich gälacht.

Doch liba Leut wie ihr ja wisst,
a dieser Tog vorübä ist.

Gemüna 1958.

Franz Fischer