Zu erschta mol a Frog, wos is denn eigendlich Gemünn?

Gemünn is die Hauptstadt innerhalb ihres eigenen Flurbereiches.

Der derzeitige Präsident van dara Hauptstadt is a sehr musikalischer Ma.
Da spielt nämlich sehr gut die gruaß Trummel un schlecht mit ölla Wucht auf dara Pauken.
A geht immä sein ägna Wag, rennt vuraus un leßt sich van ken wos sog.

Die derzeitigen Herrn Minister - früher warns ä mol Gemeinderät, doch da Zeitgeist steigt un a ihr Ahsan.
Die Herrn sen scho viel leichtfertiger als ihr Chef, denn do geht jedä an annern Wag, un dodurch ham sa ah,
a ganz verschiedenes Schritt-Tempo. Die ehn renna vuraus, dös sen die danäna wus net schnell genug geht,
und die annern humbeln hinten noch, in Gemün secht mä dös sen die Bremser.
Doch ihra gruaßen Tön die sa imma a stimme, kumma wenig zu Gehör,
denn ihr schwaches winseln wird imma van dä gruaßen Trummel übertönt.

Doch habt ke Angst ihr Gemünnä, Gemünn bleibt stehn. Wir ham nämlich a sehr starka Sicherheit in unnärn Durf.
Dann Feuerschutz, dann Grenzschutz, die Polizei un nuch a wos, nämlich die Volksarmee, besser gsogt,
dös arma Volk innerhalb des Rodachverbads. Doch leider sen van dan Verband die Anführer zur Zrit in Unordnung gäroden,
weil sa sich im Angriff gegen ihra Feind un a gegen ihra ägna Leut net enig sen.
Es möcht nämlich a jedä von danäna nur an Land gewinn obä kes verlier, dös könna die Klen, denn die ham ja sua nex zä sog`n.

Un wenn dös jo ämol zu einer Ausänannäsetzung kümmt, Leut do Braucht ihr euch net zä fürchten,
denn die schießen net weit, un wenn sa scha schießen nochert traff´n sa nett. Dös kümmt nämlich do ha:

erschtens ham sa sehr wenig Pulver – Gäld –

zweitens ham sa ke Treffsicherheit, weil nämlich jeder van danäna Kanona ah anners Ziel hot.

Also hammä ke Angst, denn a alts Sprichwort secht:

Da Hund der gauzt, da beißt net.

Wir könna a beruhigt gsei, denn da scha vur Jahrn begunnäna Bürgerkrieg is zur Zeit im abflaun,
bis auf so einige Machenschaften mh mh mh, na ja ihr wisst ja, da Max un seines Gleichen.

Gemünda 1959.

Franz Fischer .

zurück